香港工程師學會o係4月13-16號搞左個長江三峽考察團，本來我唔係會員唔應該去o既，不嬲都只係o的大佬會帶埋老婆去，不過老公問過主辦單位話OK咁我都可以跟埋佢去啦。

我地13/4請左一日假，2:00pm o係九龍塘集合，搭旅遊巴去深圳機場，其實架機係6:45pm至起飛o既，係佢地預多左時間，咁我地同成班後生仔女就去KFC食o的野先啦。去到宜昌機場係八點幾啦，跟住再搭個幾鐘旅遊巴至去到三峽東山酒店，主辦單位仲幫我地安排左個夜宵(大陸係叫夜宵，唔係叫宵夜)，豐富到好似食晚餐咁，成十幾碟送o係檯，邊食得哂呀...

14/4 o係酒店食完早餐，跟住就去左三峽工地展覽館，再去工地參觀，望到好宏偉o既長江三峽，勁呀！下晝就有個三峽開發總公司領導座談會，嘩... 悶到呢... 個總經理企o係台上面連續講左三個鐘，未停過呀，而我就勁釣魚囉，好在有人陪我，前面有兩個大佬o既老婆都同我一樣，實在頂唔順啦！

15/6繼續睇水壩，我地去左清江隔河岩水壩及水力發電廠，都真係有o的悶，而我老公見到就好開心，又勁影相囉。下晝有得搭下船遊覽清江水庫，睇下山水，都幾靚o既，下晝就去行武落鍾離山，行左兩三個鐘呀，唔知點解今次行山反而無幾星期前去拜山咁累喎，行完之後我地又搭返船返去啦。

16/4去睇最後一個水壩啦，叫做葛洲壩，其實我就覺得好似個個都差唔多樣，無乜分別咁o既，不過班工程師就梗係好鍾意睇啦！睇完去左黃陵廟，無乜特別，下晝去中華鱘研究所，我地親眼見到一條活生生，幾十尺長o既中華鱘呀，好大隻呀，如果你唔傷害佢，佢係唔會咬人o既。跟住我地去行三遊洞，我地見到有人跳Bungee Jump呀，問過人原來只係$160咋，老公幾想去跳呀，不過我堅決唔俾呀，咁鬼cheap，點知有無危險呀，你知大陸o的野幾化學架啦！我叫佢如果想去跳就去紐西蘭跳，大陸真係好驚囉。跟住又行左幾個鐘頭，就去到食飯o既地方啦，間餐廳係o係懸崖邊起架，好似吊住咁架咋，幾驚險呀。我地食完飯跟住就去機場啦，搭夜機，又係停深圳機場，過關都等左一陣呀，搞到接近兩點至返到屋企。